O Abastecemento é a primeira fase do ciclo integral de uso da auga. O Consorcio de Augas do Louro abastece actualmente aos concellos de Mos, O Porriño, Salceda de Caselas e Tui, que en conxunto suman unha población no entorno de 60.000 habitantes, con presenza dunha relevante compoñente industrial. Nesta fase inclúense as seguintes operacións
Abastecemento de auga
Captación
A fase de abastecemento comeza coa captación da auga no medio natural, que pode realizarse desde un encoro ou directamente desde un curso fluvial. No Consorcio, a ETAP Os Valos abastécese de auga procedente do encoro de Eiras, alimentado polo río Oitavén. Pola súa banda, a ETAP As Chans recibe a auga bruta do río Miño para o seu posterior proceso de potabilización.O encoro de Eiras está formado por unha presa de tipo bóveda e ten unha capacidade de almacenamento de 21 hm³, cunha superficie preto das 149 hectáreas. Desde ese Encoro abastécese á ETAP de Os Valos (Mos), que á súa vez abastece a Mos (parcialmente), O Porriño e Salceda de Caselas.O concello de Tui abastécese captando auga do río Miño a través de unha estación de bombeo de auga potable (E.B.A.P.) situada en Paramos, que impulsa a auga ata á ETAP de As Chans (Tui).
Tratamento de potabilización:
As dúas principais instalacións de potabilización son a ETAP Os Valos e a ETAP As Chans. No primeiro caso, na ETAP Os Valos, a auga bruta accede á instalación por gravidade a través dunha tubaxe de adución de 600 mm. Nesta instalación recibe tratamento mediante un sistema de filtración composto por seis filtros aéreos de area. Posteriormente, esta auga desinféctase mediante a dosificación dun reactivo denominado cloro gasoso. Tras este proceso, almacénase no depósito de cabeceira para ser enviada cara á rede de distribución. Esta instalación ten unha capacidade de potabilización de 250 l/s.No caso da ETAP As Chans, a auga bruta chega á instalación impulsada por bombeo desde o río Miño. Esta planta dispón de dúas liñas de tratamento independentes, cunha capacidade de potabilización total de 180 l/s. A filtración realízase a presión, impulsando a auga bruta mediante un sistema de bombeo cara os filtros pechados, nos cales existen dúas etapas de filtración. Posteriormente, a auga recibe tratamento de desinfección mediante a dosificación dun reactivo denominado hipoclorito sódico e pasa a ser almacenada no depósito de cabeceira e no depósito de distribución para ser enviada ás redes.
